( اطلب كفيل معكفات المخاليب ) نصيحة لوالدي الشاعر / مطلق بن جديع الرويس

[محمد مطلق الرويس]

بديت باسم اللي يفر الدواليب = الخالق الرزاق علام غيبه
اللي خلق خلقه بحكمه وترتيب = ولاحد(ن) يحوش ارزاقها بالغصيبه
اليوم يامحمد طلبتك مطاليب = اما يروح الحق والا تجيبه
نصيحة(ن) من واحد(ن) له تجاريب = وأخذ من أطراف المراجل نصيبه
الاوله بالك تفك المقاطيب = خصا(ن) ليا صارت حبالا(ن) قطيبه
الدين والدنيا توديك للطيب = والمعصيه تجلب عليك المصيبه
ترا عيالا(ن) ما تعرف المواجيب =لاخير في حضورها والمغيبه
أن كان ماجاك الفتى كنه الذيب = في وسط ربعه والرجال تحكيبه
ما يتبع الهين وشين الهناديب = والا جليس السؤ لين يغديبه
والثانية لا تترك البيت وتغيب = تراء المراجل يامحمد صعيبه
من غاب عن بيته لقوبه عذاريب = ومن صد عن ربعه قليلا(ن) صحيبه
ومن يطلب الخلاق تراه ما يخيب = اعراف ترا الله ما يخيب حبيبه
(اطلب كفيل معكفات المخاليب) = اللي رزق حجرف وهو في شعيبه
أرسل عليه مليات المحاليب = في ليلها بارضا(ن) خلا مادريبه
الرزق ماياتي بضرب المشاعيب = ما تجيب شيء(ن) خالقك مايجيبه
وأيامنا ماهيب دايم تعاجيب = لابد من يوم(ن) يسد التريبه
أما يجيك أسباب والا بدا الشيب = راح الشباب ولا بقا الا سريبه
لا تطلب الشرهات عند المعازيب = أطلب من الله والدعاء يستجيبه
حافظ على الشيمه وترفعك ياذيب = تراء ضعيف النفس يوذي قريبه
وصلاة ربي عد ما حنت النيب = على النبي اللي مقره بطيبه

للشاعر / مطلق بن جديع الرويس

[الــــــنداوي]

صح لسانه شاعرنا مطلق بن جديع
وأعتلاء شانه



الله يعطيك العافيه
أخوي محمد
على النقل الجمييل

بأنتظار جديدك




ينقل للقسم المناسب
يستحق التقييم

[ابوجوفان.]

صح لسانه والله يعطيك العافيه

[بناخي الخلاوي]

صح لساااااااااااااااان الشاعر وبيض الله وجهك على النقل